20 May, 2020 02:50:59 PM


നാലു ദിവസം: പോസ്റ്റുമോര്‍ട്ടം കാത്ത് യുവതിയുടെ മൃതദേഹം; പരസ്പരം തര്‍ക്കിച്ച് അധികൃതര്‍




കാസര്‍കോട്: ആശുപത്രിയിലെത്തിച്ച യുവതിയുടെ മൃതദേഹം നാലുദിവസമായിട്ടും പോസ്റ്റുമോര്‍ട്ടം നടത്താതെ അധികൃതര്‍. മംഗല്‍പാടി ഹെരൂര്‍ സ്വദേശി ദിവാകര ആചാര്യയുടെ ഭാര്യ ശോഭ (35)യുടെ മൃതദേഹമാണ്​ നടപടിക്രമങ്ങള്‍ സംബന്ധിച്ച് ആശുപത്രി അധികൃതരും പോലീസും തമ്മിലുള്ള തര്‍ക്കത്തെ തുടര്‍ന്ന്​ പോസ്​റ്റ്​മോര്‍ട്ടം ടേബിളിലെത്താന്‍ വൈകിയത്​. ഇതോടെ സംസ്​കാര​ ചടങ്ങുകള്‍ നടത്താനാവാത്ത വിഷമത്തിലായി​ കുടുംബാംഗങ്ങള്‍​. കഴിഞ്ഞ ഞായറാഴ്ച്ചയാണ് ശോഭ മരിച്ചത്. ദേഹാസ്വാസ്​ഥ്യം തോന്നിയ ഉടന്‍ മംഗല്‍പാടി ആശുപത്രിയിലെത്തിച്ചുവെങ്കിലും ജീവന്‍ രക്ഷിക്കാനായില്ല.


ഉച്ചയോടെ മൃതദേഹം പോസ്​റ്റ്​മോര്‍ട്ടത്തിനായി കാസര്‍കോട്​ ജനറല്‍ ആശുപത്രിയിലെത്തിച്ചു. പനിയും ചുമയും ഉണ്ടായിരുന്നതിനാല്‍ കോവിഡ് പരിശോധന വേണമെന്ന് ജനറല്‍ ആശുപത്രിയില്‍ നിന്ന്​ അറിയിച്ചു. ഈ പരിശോധനഫലം നെഗറ്റീവായിരുന്നു. സംസ്കാര ചടങ്ങുകള്‍ക്കായി മൃതദേഹം വിട്ടുകിട്ടണമെന്ന് ആവശ്യപ്പെട്ട്​ മൂന്നുദിവസമായി വീട്ടുകാര്‍ ആശുപത്രി അധികൃതരുമായി ബന്ധ​പ്പെടുകയാണ്​. എന്നാല്‍ വ്യക്തമായ മറുപടി ലഭിച്ചില്ല. പോസ്റ്റുമോര്‍ട്ടം നടത്തണമെന്ന്​ വീട്ടുകാര്‍ക്ക് നിര്‍ബന്ധമില്ലായിരുന്നു. മരണ വിവരം ആശുപത്രി അധികൃതര്‍ പൊലീസില്‍ അറിയിച്ചിരുന്നില്ല. ബുധനാഴ്ച്ചയാണ് പൊലീസ് എത്തുന്നത്. എന്നാല്‍ പൊലീസ് ഇന്‍ക്വസ്റ്റ് റിപ്പോര്‍ട്ട് തയാറാക്കിയപ്പോള്‍ മരണകാരണമെഴുതാത്തതും പ്രശ്​നമായി.


ദിവസങ്ങള്‍ കഴിഞ്ഞതിനാല്‍ മൃതദേഹം പോസ്റ്റുമോര്‍ട്ടം നടത്തണമെന്ന് കുടുംബം ആവശ്യപ്പെട്ടിട്ടുണ്ട്​. പൊലീസ്​ മരണകാരണം എഴുതാത്തതിനാല്‍ ഫോറന്‍സികിന്‍റെ സാന്നിധ്യത്തില്‍ മാത്രമേ പോസ്റ്റുമോര്‍ട്ടം നടത്താനാകൂവെന്നും അതിനാല്‍ മൃതദേഹം പരിയാരത്തേക്ക് കൊണ്ടുപോകണമെന്നുമാണ്​ ജനറല്‍ ആശുപത്രി അധികൃതരുടെ വാദം. എന്നാല്‍ ജനറല്‍ ആശുപത്രിയില്‍ തന്നെ പോസ്​റ്റ്​മോര്‍ട്ടം നടത്തണമെന്നും പരിയാരത്തേക്ക്​ കൊണ്ടുപോകാനുള്ള സാമ്പത്തികശേഷി ഇല്ലെന്നും​ കുടുംബം അറിയിച്ചു. അതേസമയം, മരണകാരണം എഴുതണമെങ്കില്‍ മൃതദേഹം മരിച്ച നിലയില്‍ കാണണമെന്നാണ്​ പൊലീസിന്‍റെ ശാഠ്യം. ഇതോടെ നടപടിക്രമങ്ങളുടെ നൂലാമാലകളില്‍ കുരുങ്ങി നില്‍ക്കുകയാണ്​ മൃതദേഹം.



Share this News Now:
  • Google+
Like(s): 6